القاعدة الأساسية لتعويد الرضيع على .... أي حاجة

أيون و باختصارون شدييييييييدون
عايزة أقولكم على القاعدة الذهبية
عايزة تعودي بامبينوكي على أيتها حاجة ممكن تفكري بيها أو تتخيليها
يبقى عليكي و على المعسكر
أينعم
المعسكر العادي في تفكيرنا إنه منطقة تدريب مكثف في فترة زمنية محددة
و هو ده الأساس
عايزة تعودي طفلك على حاجة يبقى
1. تواظبي عليها فترة طويلة من الزمن - مش أقل من شهر و ده في رأيي قليل أوي - بنفس النظام
يعني مثلاً عايزة طفلك ينام الساعة من 10 بالليل يبقى :
أ. تحددي روتين معين - تغيير البامبرز ندخل السرير النور مطفي الرضعة
ب. كل يوم في نفس الوقت تبدئي مراسم النوم - يعني هينام من 10 تبدئي من 9ونص مثلاً
جـ. كل يوم كل يوم كل يوم نفس الحدوتة دي تطبقيها
مع ملاحظة إنك تكوني مرنة شوية يعني ممكن يطول معاكي في يوم عشان مش عايز ينام ، خليكي معاه لكن متلعبيش معاه و خلي الدنيا ضلمة و الصوت هادي و هو هينعس حتى و هو بيلعب

2. و دي اكتشفت أهميتها قريب لما بدأت أعك
( عسكري في بيتكم )
أيييييييييييون
لما تقرري تنظمي يومكو انتو الاتنين و تعوديه على حاجة معينة يبقى حاولي دايماً فغي الوقت ده تكونوا في بيتكو و تلتزمو بالروتين ده
لإن يوم واحد بس لخبطة ممكن تقعدي تصلحي فيه أسبوع
ما بالك لو بقوا اسبوع و للا شهر
هترجعي تربي من الأول تاني - آه و الله يا أوختشي منك ليها إنني في هذه الدوحديرة حالياً مع الاعتذار لثلاثي أضواء المسرح

3. و دي من أهم الحاجات اللي تخلي بالك منها في كل حاجة بتعمليها
خليكي واثقة في أسلوب تربيتك للبيبي بتاعك
ملكيش دعوة باللي يقولك انتي بتحلمي و ده بيبي و مش هيتعود من دلوقتي
أو انتي هتنيميه بدري أوي كده ليه و هو هيصحى للمدرسة و شوية التريقة الحلوين اللي مبقيناش نعرف نتكلم من غيرها
اقلبي الموضوع بهزار بس بشكل يجبر اللي قدامك على إنه يحترمك و يلتزم مع طفلك بنظامك انتي و خليكي ثابتة على موقفك
عشان تقدري تربي بامبينوكي صح بإذن الله


أتمنى أكون قدرت أوضحلكم الطريقة و تكونو فهمتوني
و لو في أي حاجة عايزة توضيح يا ريت تنبهوني و هاكون شاكرة ليكو جداً
^ـ^

New Tiny Mamy