- حالة اختناق شاملة كاملة مسيطرة
- عيون عندها كرش فوق و كرش تحت و مش راضية تخس - متنفخة من الآخر يعني
- مع وجود أي صوت عايزة تخبطي راسك ف الحيط و لو ينفع تضربي اللي عمل الصوت هتحدفيه بأقرب فازة أو مج نسكافيه - لو كنتي فوقتي خمساية و عملتي لنفسك واحد
إيه تاني ؟؟ إيه تاني يا بت يا مامي ؟؟
آه افتكرت
- حالة نكد متشعبة
- رفض للتعامل مع أي كائن آدمي يستطيع تلبية رغباته بنفسه - الحلة ع الوابور اتصرفوا أنا آعدة في مكاني مش منقولة
- و على حسب مدى اكتئابك تتراوح ما بين 2 أوضة إلى شقة كاملة مكركبة و محتاجة تتلم كلها على بعضها في كيس زبالة أسوداني مخروم
- رفض إن البيبي يتلمس من قِبل أي كائن متحرك غيرك
أهنئك يا أوختشي
فهذه هي ببساطة .. بعض أعراض اكتئاب ما بعد الولادة - و شيء بديهي مش مستاهل يتكتب إنك بتقضي يومك ما بين ( رضاعة - بامبرز - عياط )
و هات الأكل معاك يا بعلي أنا مطبختش
كانت أياااااااااااام
الحلو فيها لما البيبي ينام
و تلمسي وشه بإيدك و تحسيه ناعم و ملائكي بشكله و حجمه اللي زي عقلة الإصبع بالظبط - مع وجود احتمالية إنك تدعي على نفسك لو صحي من لمسة إيدك دي و صدقيني هتركهي روحك أكتر ما انتي كرهتيها من بداية الاكتئاب ... الحل : إيدك تكون دافيه قبل ما تتهوري و تتهيأي نفسياً للاحتمالية دي
و المشكلة إن أي أم عدت ع المرحلة دي بحوالي 10 -15 سنة هتبقي انتي في نظرها مأفورة ، نكدية ، مش شايفة نعمة ربنا ، ربنا يكون ف يعون جوزك و إلخ إلخ إلخ من الوجبات الخفيفة اللذيذة من تقطيم الوسط و تكسير المجاديف
إلا بقى لو ربنا أكرمك بناس متفهمة واعية كده تقدر حالاتك النفسية
زوج حسيس يقدر البلا اللي انتي فيه و خلاص يا عيني هيلطم عَ الشقة اللي غرقت في شربة ملح - دموعك يا مودام
حماتك بتصعبي عليها من الهم اللي هي بتسعيد ذكرياته معاها فهتعيط عليكي
أمك اللي قاعدة تتفرج عليكي و انتي بتعيطي و غولبت معاكي
أنا شخصياً
في حالة عياط ريتاج كنت باخدها في حضني - بعد ما أكون متأكده إني غيرتلها البامبرز - و أحاول أرضعها و غالباً مبتبقاش عارفة ترضع كويس - البت كانت لسه يوم و نص - و هي تعيط و أنا أعييييييييييييييييييييييط معاها
هي تعيط و أنا أعييييييييييييييط جنبها
و أمي الغالية و زوجي العزيز واقفني يتفرجوا عليا - بعد فشل محاولاتهم المضنية إنهم ياخدو مني البنت يحاولو يهدوها و أنا أريحلي شوية
المشكلة بتبقى فين بقى ؟؟؟؟
المشكلة إنك لسه تعبانه من علقة الولادة - سواء طبيعي أو قيصري الاتنين عذاب - و هرموناتك عاملة خريطة لا تندرج تحت أي مسمى عقلاني غير إنها متلخبطة و عاملة حوادث مرورية مع بعضها
و فوق ده و ده .. مطلوب من تراعي كائن صغير نايم جنبك مبيعرفش يعمل حاجة غير إنه يعيط - يمعني الكلمة
لا عارف يمص عشان يرضع
و لا عارف يحزق عشان يعمل بي بي
كل اللي قادر عليه .. يعيط
و على رأي Pappy
The Baby is .... CRYING
دايماً كان حلها كده
فده عادي يعني
لكن في أوقات بيبقى ده على الأعصاب ضغط أووووووووووفر أووووووووووي
New Tiny Mamy
المشاركات
0 التعليقات:
إرسال تعليق