حمل الطفل الرضيع .. تعويد أو لا تعويد

أشهر كلمة ممكن أي نيو مامي لأول مرة تسمعها عن النونو الجديد بتاعها
( متعوديهوش ع الشيل ) ما يستتبعه هذا الفعل من ( سيبيه يعيط ) و ( اتأكدي إنه شبعان و نضيف ) و ( عادي لو زهقان سيبيه عشان ماياخدش ع الدلع )
صدقوني لو فكرتي تسمعي الكلام ده و تطبقيه هتبقي حاجة من اتنين أو تلاتة
يا هتبقي عايزة تلطمي - في أبسط الحالات
يا إما ترَزَّعي دماغك ألف مرة ف الحيطة - و ده العادي في الطبيعي
يا إما تفكري ف الانتحار - و ده لو حاولتي جدياً تطبقي الكلام اللي فوق حرفياً و هذا ما لا أنصح بيه بتاتً سواء الانتحار أو تطبيق ما يقال

بالعقل كده فكري معايا
كائن طول عمره - 9 شهور - و هو عايش جواكي
حاسس بيكي
قلبك صوتك مشاعرك
ضحكك و بكائك
عايش في درجة حرارة جسمك 38 - يعني حتى لو مولود في عز الحر هتبقى دنيتنا برد بالنسباله
لما تلمسيه و هو ف بطنك تلاقيه بيحاول يمسك إيدك من جوا
كائن لا حول له و لاقوة
لا عارف يتكلم و يشتكي
و لا فاهم إيه اللي بيجراله فجأة بعد ما كان دفيان و لا عرف جوع و لا عطش و لا مغص و لا بطه واجعاه عشان مش عارف يخرج الفضلات ( البول و البراز )
كائن زي ده إزاي من أول ما يتولد يبقى مطلوب مننا - كأمهات - نسيبه يعيط طالما لسه واكل و نضيف ؟؟؟؟؟
إزاي بعد كل اللي النعيم اللي كان فيه ترميه في سرير بارد لوحده و المفروض انه يتعلم إنه يسكت !!!!!!!!!!!!!!!!!!!!!!!!!!!!! ؟؟

الخلاصة
إن الكلام ده - في رأيي - ظلم شنيع
للطفل و ليكي انتي كمان
بالنسبة ليكي الموضوع يتلخص فما يلي
أعصابك هتتعب من بكاه و قلبك هيبقى بيتقطع
و آخر دراسة أجريت على أكثر الأصوات إثارة للتوتر و تشتيت الذهن صوت بكاء الأطفال الصغيرين
فتخيلي لما يكون ده النونو بتاعك انتي اللي لا حول له و لا قوة

أما بقى بالنسبة للطفل
فاحنا قولنا إنه كان عايش ف نعيم ما بعده نعيم ف الدنيا
مش أول ما ييجي ترميه ع السرير و تبقي عايزاه يفضل ساكت
الطفل ببساطة محتاجك جداااااااااااا
محتاج حضنك عشان يسمع دقات قلبك فيطمن - ده اللي بيخليه يطمن مش مجرد إنه اتشال و خلاص
محتاج يعرفك .. محتاج مساعدتك في إنك تخلصيه من وجع بطنه اللي هو مش فاهم هو إيه ده
ممكن تبقى عضلات أمعاءه خاملة لسه و مش عارف يخرج البراز و ده بيبقى بيوجعه جامد و يبيعكنن عليه
- بنتي تاني يوم الولادة فضلت طول اليوم تعيط و بتهداش و معملتش براز مع إني قريت إنه المفروض تعمل كتير أول كام يوم و روحت بيها لمستشفى أطفال عملولها فحص شرجي و خرجو كمية براز فظييييييييييعة البنت بعدها هديت كإنها يا عيني هبطانة من تعب اليوم -

نيجي بقى للأهم
أنا على عكس كل اللي بيتقال
أنا هقولك شيليه
في موقع ع النت - على ما أذكر أرابيا بيبي سنتر بتاع جونسون - بيقول إن أول كام شهر من عمر الوليد من الضروري إنك تلبيله احتياجاته العاطفية و إنك تشيليه و مش هو ده اللي هيخليه ياخد ع الدلع
و لو دورتي ع النت على أي حاجة المفروض تعلميها للطفل أو تدربيه عليها هتلاقي أول شرط إنك تطمنيه و إنه عاطفياً يكون مكتفي
من الآخر كده يعني شبعان من حنانك و مطمنلك إنك في أي موقف صعب عليه هيلاقيكي
ينام لوحده - لازم يكون شبعان من حنانك
استعمال الحمام - شبعان من حنانك
يروح حضانة أو تسيبيه مع حد عشان وراكي مشوار و للا حاجة - مطمنلك إنك هترجعيله ف الآخر
يعني نونتك لازم تشيليه و تدلعيه و تضميه لحضنك و تبوسيه
و لو نام ممكن تخليه نايم على بطنك يفضل حاسس بقلبك و انتظام حركة نفسك
كل ده بيفرق مع النونو
مش معنى كده كل ما ينام تنيميه على بطنك
لكن شوية كده و شوية تنيميهجنبك مكان ما انتي قاعدة - افرشيله فرشه في الصالة جنبك لما ينام تنيميه عليها
شوية و عوديه لما ينام بتدخليه في السرير
بالتدريج تبدئي تعوديه إنه يبعد عنك شوية

كمان موضوع الشيل
شيليه لكن هقولك من غير وقوف و مش كل مرة تشيليه تهزيه
لأ شيليه في حضنك و انتي قاعدة
لو مش جعان أو لو هو نضيف و بيعيط
لو ممغص اعمليله تمارين البطن و رضعة الأعشاب و دوا المغص بتاعه
لو زهقان - ف العادي الناس هتولك سيبيه - أنا لأ
هقولك خديه غيريله المكان
خليه يشوف مكان جديد من البيت
الطفل لما بيكبر و يتحرك بيعرف يسلي نفسه
لكن و هو صغير كده بيبقى معتمد عليك حتى في تسليته

من الآخر متعذبيش نفسك بإنك تسيبيه يعيط و انتي قلبك بيتقطع
هييجي وقت بيقى بيعيط استعباط و مش هيفضل عياطه كتير
لكن لحد ما يبدأ يفهم إيه اللي بيجراله في العالم الغريب ده
شوفيه عايز إيه و اعمليهوله
بحب و حنان
New Tiny Mamy