أينعم
من دلوقتي لازم تتحولي لقائد حربي محنك
أي حاجة عايزة تعمليها لازم تخططيلها الأول من بدري و تحطيلها خطط و خطط بديلة
نبدأ بموضوع النوم .. نظراً لإنه بيتحول لعملة مش هقولك نادرة .. دي عملة مفقودة من بعد الولادة لكام شهر أدام
(1) أول تكة و خدعة
لو نونتك لازم تكوني لازقة فيه عشان ينام و لو نزلتيه ع السرير أو بعدتي عنه بيصحى و يقلبها مناحة
هاتي تي شيرت مش بيتلبس كتير و إلبسيه انتي في يوم و اهري نفسك حركة تنطيط و شغل البيت يومها
المطلوب إنك تعرقي في اللي انتي لابساه ده
و اوعي ترميه في الغسيل .. لأ حضرتك كده زي الشطورة هتقلعيه و تعملي بيه إيه بقى
تقلعيه و تفرديه جنب نونتك على السرير
الفكرة : إن ريحتك هتبقى جنبه لزق فهيفتكرك لسه جنبه ... و تصبحي على خير إن شاء الله :)
(2) تاني فكرة معتمدة على طبيعة نونتك
حاولي متلتزميش بسن معين تفصلي فيه نونتك في سرير لوحده
ممكن من تاني أسبوع .. ممكن من 3 شهر
الفكرة : إن طفلك ممكن يكون نومه خفيف أووووووووووي - زي حالة الأستاذة ريتاج - فلو النونو بينام جنبكو ع السرير بتاعكو و حد فيكو هز رجله و للا فكر يتقلب النتيجة هتبقى كارثة و النونو باشا هيصحى و يظبطلكو ليلة من ليالي الصياح البديعة
- أفتكر يوم ما نيمتها لأول مرة في سرير لوحدها حسيت بفرق الساعة الزيادة اللي نمتها و اكتشفت إن أنا اللي كنت معذبة نفسي بإنها نايمة جنبنا و بتصحى من حركاتنا سواء طالعين السرير نازلين من عليه بنتقلب كانت بتبقى ليالي فل الصراحة اتعلمنا فيها الأدب إنما إيه
(3) لما طفلك يبدأ يتقلب و بفرك أو يزحف شوية
لما تيجي تنيميه في سريره متنيمهوش غير في نص السرير
عشان الفترة اللي بيبدأ فيها يتحرك دي لما بينام بالليل بيبقى بيتحرك كتير برضه
فهتلاقيه اتقلب و بدأ يزحف و لو ملقاش مساحة أدامه هيعييط و عياطه هيصحيه و انتي كمان هتصحي عشان تنيميه
فانتي من الأول تنيميه في النص و مكان ما يحب يتحرك يتحرك بقى
- أنا كنت بنيم ريتاج ز الكبار راسها عند أول السرير ، بعد فترة من العذاب الليلي باباها قالي جربي تنيميها في آخر السرير في النص ما دام بتزحف و تقف على أول السرير سيبيلها مساحة تتحرك فيها على ما توصل لأول السرير يكون فات وقت كويس تناميه و اكتشفت للمرة التانية إن أنا اللي كنت بعذب نفسي -
المشاركات
