بابي .. يا بابي .. يا بابي (1)

دي ببساطة كلمة متكررة بغنيها لريتا لما بابي بييجي عشان تعرف الكلمة
و بما إننا بنتكلم عن سنة أولى ريتاج أو سنة أولى نونو كل واحدة فينا
فمينفعش منتكلمش على البابي

بجد البابي ده أهم عنصر في حياتك في السنة دي
من غيره صعب إن تستحملي
محتاجاه يكون جنبك و يهون عليكي
و كتير هتحتاج إنه يشيل عنك شوية - و لو 5 دقايق بس بتفرق و الله

طب عشان تقدروا تعملوا كده إيه المطلوب ؟؟؟

المطلوب يا ستي ما يلي
إنك تاخدي بالك إن الراجل طبيعته غيرنا
بتبقى مشاعره جواه ... لكن مبيعرفش يعبر عنها أو يطلعها لوحده
يعني ممكن يبقى قلبه بيتقطع عليكي لكن مش عارف يقولك إيه و لا يعملك إيه !!!!

الراجل مينفعش معاه تلميح .. لازم تطلبي الحاجة وش كده - كإنك بترميله قنبلة كده صوتي في وشه " خد الواد شوية هو مش ابنك برضه " :D :D
ملحوظة : إنني أهرجون .. أينعم انتي تطلبي لكن مش تحدفي الواد و هو ينط يشقط :D
هتبقي صعبانه عليه و ممكن يدعيلك كتير و تسمعيه
لكن مش هيقولك كتير ياخد منك النونو أو يتولى نيابة عنك إحدى المهام الإعجازية اللي بتعمليها - تغيير للبيبي غسيل طبيخ أي حاجة اوعي تقولي لأ
بس انتي اطلبي
قوليلو بكل بساطة " يالا يا بابي عايزين نغير البامبيزو" - ده مصطلح موازي للبامبرز أنا لسه هقولها كلها :D
و هكذا

حاجة مهمة كمان
قولنا قبل ما تعمليش نفسك سوبر مامي
متحاوليش تعملي نفسك ستي الفتكة و تشيلي كل شغل البيت و الأكل و النونو لوحدك
اطلبي منه زي ما قولنا
و كمان اشركيه معاكي في كل حاجة
يعني حتى لو مطلبتيش منه حاجة انهرده .. احكيله كل حاجة
" ده أنا صحيت عملنا كذا و النونو عمل كذا ، و لما نام عملت كذا " أو " لما نام مكنتش قادرة أعمل حاجة كنت ميتانة و قعدت مكاني كده مش قادرة أتحرك " .... إلخ إلخ إلخ
خليه يحس بيكو و بيومكو عامل إزاي
خليه يحس إنه جزء منكو

مش ماكنة ATM  و بس

إحساسه بإنه معاكو على طول و عارف إيه اللي بيحصل هيحسسو أد إيه انتي بتتعبي

و صدقيني لو مكنتيش محسساه بأهمية اللي بيعمله لطفله ممكن ميعملش حاجة
فمن الأول متفصيليهوش عن طفله
لو فقد إحساسه بيه هيبقى صعب ترجعيه
خليه دايماً معاكي في الصورة
أو بالأصح خليكو انتي و النونو معاه في الصورة بتاعته على طول
فاكركو بيعمل معاكو بيلاعب و يغير و يدلع و يأكل و يشيل
أو حتى يمسح على راسه و هو نايم
و أحلى حاجة بقى
عوديه يحاول يخصص وقت كل يوم أو يومين أو 3 بالكتير أوي يرقيكو فيه - انتي و النونو
و الأهم النونو - و هنتكلم ع الموضوع ده بعدين
بس صدقيني إحساسه إنه مسئول عن حماية و تحصين ابنه رغم إنشغاله عنكو فترة طويلة من اليوم هيسهل عليكي إنك تخليه جزء من حياتكو دايما

و حياة سعيدة ليكو كلكو
^ـ^

أكاذيب ما بعد الولادة ... متعوديش البيبي على الدلع

أكتر كلمة هتلاقي الناس بتقولهالك
" اوعي تشيليه كتير ( عشان مياخدش ع الدلع ) "
" مش كل ما يزن تشيليه ( عشان متعوديهوش على الدلع ) "
و إلخ إلخ إلخ مما لذ و طاب
و أجمل حاجة
إن كل ما الواحد يقولك الكلام ده أكتر كل ما تلاقيه هو أكتر واحد بيشيل و يهز و يدلع
- تماسكي مش عايزاكي تصوتي -
طبعاً لما هو يشيل و انتي تحاولي تسمعي الكلام هتلاقي نفسك متدبسة في عيل بتعوديه من الأول تاني على نظامك
يعني م الآخر هتربي في الواد من الأول تاني
- قولتلك امسكي أعصابك -

اللطيف بقى في الموضوع و اللي اكتشفته بعد الحروب اللي لخصتهالك فوق دي
ان يا حبيبتي لا براحتك خالص
شيلي و دلعي و هنني و افرحي بيه براحتك خااااااالص
لو قعدتي الـ 24 ساعة شايلاه يبقى حلو
الواد بتاعك محدش ليه عندك حاجة
بالعقل كده فكري معايا
هم ليه بيقولو هيتعود ع الشيل و الدلع ؟؟؟؟
مال هو جواكي 9 شهور كان إيه بالظبط ؟؟
كان بيتعب و يشقى عشان يكون نفسه و يصرف على نفسه مثلاً ؟؟؟
ما هو كان متهني ألف و مليونين قراريط
يعني هو نازلك واخد على الدلع
كل اللي تعمليه يا حبيبتي
إنك واحدة واحدة تعوديه ميبقاش معاكي على طول
و أقلهالك تاني
عشان توصلي لده
لازم أول كام شهر تخليه يشبع أوووووووي منك و من حنانك
عشان بعد كده يعرف يقعد يلعب لوحده و هو مطمن إنه وقت ما يحتاجك هيلاقيكي
معلش أنا عارفة إن الموضوع متعب أوي ف الأول
انتي لسه قايمة من الولادة و جوزك و البيت و النونو محتاجك كتير
لكن معلش مش مشكلة الأكل و البيت
حاولي تتفقي مع زوجك انه يستحمل معاكي شوية شهرين كده أو تلاتة
و بعدها هترتاحو شوية زيادة كل ما يكبر و هو شبعان من حنانكو حبكو

الخلاصة إنك مش كل اللي تسمعيه تطبقيه عمياني كده - زي ما أنا عملت لحد ما شغلت مخي تاني
البيبي كان جواكي متدلع و متهني و بيتهز على طول
انتي شيليه و عوديه يشبع منك و يسيبك شوية
مش " متشيليهوش عشان مياخدش ع الدلع " !!!!!!!!!!!!!!!!